Málverjin hevur spælt við KÍ síðani 2016, men hevur ongan sáttmála fyri 2022.

Enn er ikki avgjørt, um 28 ára gamli Kristian Joensen heldur fram í KÍ.

- Eg havi onga avgerð tikið enn. KÍ ynskir at leingja og vit hava tosað saman gjøgnum árið. Síðani eru tað fleiri onnur feløg, sum eg havi tosað við. Enn eru allir møguleikar opnir og eg dugi ikki at siga, nær ein avgerð verður tikin, sigur Kristian Joensen við Norðlýsið.

Kristian Joensen bleiv valdur til ársins málverja í 2016 og 2019 og hevur eisini fleiri ferðir verið ein av málverjunum í A-landsliðshópinum. Í ár byrjaði hann at verja málið hjá KÍ fyrstu umførini, men eftir 6. umfar tók Mathias Rosenørn plássið og stóð restina av kappingarárinum.

Sum skilst er barndómsfelagið NSÍ eitt av feløgunum, sum vísir málverjanum áhuga.