189 fyritøkur úr øllum heiminum luttaka á sjóvinnustevnuni í Klaksvík, sigur Áki í Skemmuni stjóri

Allir básarnir eru bókaðir, tað er fult, sigur ein vælhýrdur Áki í Skemmuni í telefonini í morgun. Fyrireikingarnar til Atlantic Fair, sum verður í døgunum 28. til 30. mai, eru í hæddini. 

Badmintonhøllin og KÍ-høllin eru karmar um sjóvinnustevnuna, sum hevur ment seg sera nógv ár um ár og vorðin ein áhugaverdur sýnisgluggi á altjóða støði, har bæði føroyskir og útlendskir veitarar sýna fram við tí nýggjasta nýggja.

Alment messublað í hvørt heim í Føroyum

Norðlýsið og Grafia eru Official Suppliers og taka sær av øllum samskiftispartinum í samband við Atlantic Fair. Eitt blað verður gjørt í samband við stevnuna og sent í hvørt hús í Føroyum, umframt at eitt katalog verður gjørt og sýnt fram á stevnuni. Til ber at fáa lýsing í blaðið við at senda tilfar á lysing@nordlysid.fo 

Góða undirtøkan vísir, at fyritøkurnar taka sera væl undir við Atlantic Fair og vit eru sera spent at lata dyrnar upp fyri veitarum og gestum, sigur Áki í Skemmuni at enda við Norðlýsið.