Róðrarveðrið á eystanstevnu
Eitt lágtrýst nærkast Føroyum vestaneftir. Ikki so nógv megi í tí, men tað fer tvørtur um oyggjarnar beint eftir middag, ímillum Sandoy og Stóra Dímun.
Tí er ikki lætt at raka rætt við veðrinum í morgin, tá ið kappróður er í Runavík. Men vit gera eina roynd saman við einari góðari keldu á staðnum.
Á middegi eru 5 til 10 m/s av landsynningi suðuri saman við ælaveðri - t.e. inn eftir Skálafirði. Fyri tey sum rógva barnaróður, er hetta beint ímóti. Tað kann onkra løtu vera ein avbjóðing at leggja bátarnar við ungdóminum, sum fara at rógva eina løtu eftir middag.
Ættin fer eftir tað at flyta seg upp ímóti eystri og so ímóti norði. Júst hvussu skjótt er ringt at siga, men tendensurin er har frá middegi av. So fáa vit at síggja, hvussu hvør róður ávirkast.
Samstundis sum ættin fer upp í eystan, so minkar vindurin niður í 5 m/s. Hetta er síðurvindur, men so lítið, at tað fer ikki at ávirka róðurin stórvegis, um nakað. Soleiðis er um 15-tíðina, tá ið barnaróðurin er liðugur.
Landsynningur og eystan við so lítlum vindi er góð líkindi á Skálafirði. Lotið kemur oman av Hæddini, og tá ið tað er komið oman á fjørðin, er lítið av megini eftir.
Longri út á seinnapartin hækkar hann upp í landnyrðing. Hetta er um 17 tíðina, tá ið 10 mannaførini skulu rógva. Vindferðin er tá ætlandi minkað niður í 2-3 m/s. Lotið er undan, men so lítið, at tað fer ikki at nerva.
Klokkan 18 er ættin komin upp í norðan og farin vesturum til útnyrðing norðan. Enn lítil og eingin vindur, sum als ikki fer at ávirka róðurin. Tó er allatíðina seinnapartin skýggjað, og loftið grátt, skiftandi við ælaveðri og turrum veðri.