Vit eru fýra leirvíkingar, ið eru farnir til Íslands at fiska laks - Ásmund Justinussen, Ingvar Joensen, Joen Magnus Ramussen og eg sjálvur. Vit búgva í veiðuhúsinum við Ytra Ranga, tað er tann áin har mest laksur hevur verið fiskaður í Íslandi. Áin vit fiska í er umleið 15 kilometur long og tað sleppa 18 tráður um dagin at fiska, greiður Adrian Stauss frá. 

Vit hava fiska í tveir hálvar og ein heilan dag. Týsdagin og mikudagin fiskaði eg bara við flugutráðu, men tað hóskaði seg ikki, so eg var noyddur at skifta yvur til spinnara. Eg hevði nokk ikki fingið stóra laksin inn við flugutráðu, sigur Adrian skemtandi.

Hósdagin tá vit høvdu fiska í einar tveir tríggjar tímar, tá var fast. Eg merkti beinavegin at tað var ein stórur laksur. Bardagin stóðu uppá í ein heilan tíma, laksurin vildi ikki tað eg vildi, vit mundu ganga ein kilometur omaneftir áðrenn vit fingu hann inn, sigur Adrian

Laksurin vá 30 pund og var 103 cm langar. 

Verður settur útaftur

Ein so stóran laks fær man ikki heim við, hann verður sleptur út aftur. Íslendarar vilja hava genini í sínum egnu áum. Vit fingu annars 13 laksar og altso 12 av teimum fingu vit heimvið, sigur ein vælnøgdur Adrian Stauss við Norðlýsið at enda.