Skjótt kann besta mansliðið hjá KÍ fáa tvær stjørnur á blusuna
Um Víkingur ikki fær fulla úrtøku ímóti HB á Tórsvølli í kvøld, leygarkvøldið 17. september, verður tað staðfest longu í kvøld, at KÍ er føroyameistari í 2022, og harvið vinnur besta mansliðið hjá KÍ sítt 20. føroyameistaraheiti.
Í fleiri londum er traditión fyri, at fótbóltslið kunnu fáa sær eina stjørnu á blusuna fyri hvørji 10 vunnin meistaraheiti.
Her heima hevur besta mansliðið hjá HB higartil verið einasta felagið í mansdeildini, sum hevur kunnað havt tvær stjørnur á blusuni, og tað hevur felagið eisini.
Men nú KÍ bert manglar eitt stig (ella at Víkingur missur eitt stig) til at vinna sítt 20. føroyameistaraheitið, verður tað skjótt, at eisini besta mansliðið hjá KÍ kann fáa sær tvær stjørnur á kongabláu blusuna.
HB og Víkingur spæla í kvøld á Tórsvølli, so spennandi verður at fylgja við, um arvafíggindin í Havn fer at megna at handa KÍ føroyameistaraheitið 2022 í kvøld.
Hendir tað, verður lagið gott í kvøld í Klaksvík, Norðoyggjum og millum KÍ-viðhaldsfólk kring landið alt.
KOYR Á KÍ !!