Lýsing
Lýsing
Lýsing

Loyvið okkum at arbeiða við góðari samvitsku

SKRIVAÐ: Tíðindaskriv  |  03.10.2022 - 10:14 Tíðindaskriv

Í skipaferðslu skulu manningarnar hava møguleika fyri hvíld. Innan lastbilaflutning eru strangar hvílitíðarreglur galdandi. Og innan flestu framleiðsluvinnur eru eisini avmarkingar á, hvussu leingi fólk skulu vera til arbeiðis.

 

Hetta eru reglur, sum eru komnar yvir langa tíð. Ikki endiliga fyri starvsfólkini, men fyri at tryggja, at arbeiðið áhaldandi verður gjørt á ein nóg góðan hátt.

Sum kommunulækni í føstum starvi hevur tú altíð ábyrgdina av tínum sjúklingum. Hetta er galdandi allar gerandisdagar. Um kvøldið, náttina, í vikuskiftum og heiligdagar skiftast kommunulæknarnir um at vera tøkir í læknavaktini, soleiðis at fólk hava atgongd til kommunulækna alt samdøgrið allar dagar í árinum. Vanliga arbeiðstíðin er tískil í minsta lagi 40 tímar um vikuna, umframt regluligar kvøld-, náttar- og vikuskiftisvaktir. Harumframt hevur tað víst seg at vera trupult at halda frí, uttan at sjúklingarnir í størri ella minni mun verða sleptir upp á fjall hetta tíðarskeiðið - sum vit til dømis sóu í summar.

Slíkar arbeiðstreytir eru als ikki nøktandi í 2022. Arbeiðsgleðin minkar, samvitskan verður ávirkað, fólk fara úr starvi og nýggju kommunulæknarnir aftra seg við at átaka tungu uppgávurnar, ið liggja í føstu størvunum. Samstundis er tað steinur á byrðu, tá viðtalurnar ofta hava nógv fleiri enn teir ásettu 1.600 sjúklingarnar, orsakað av at fleiri kommunulæknastørv ikki eru mannað, og normeringin lutfalsliga ikki er hækkað saman við vaksandi fólkatalinum og nýggju uppgávunum, sum eru lagdar á kommunulæknarnar.

Vit, sum eru undir serlæknaútbúgving fyri at gerast kommunulæknar, eru í løtuni sera stúrin um gongdina, samstundis sum flestu okkara ikki hava mót uppá at fara í eitt fast kommunulæknastarv í verandi støðu. Tó eru vit sera positiv um útsagnirnar, sum eru komnar frá politikarum hesar seinastu dagarnar. Men tað hevði verið sera ynskiligt, at hetta tosið gjørdist meira konkret, so at vit kunnu síggja fram til broytingar.

Vit fegnast eisini um positivu útsagnirnar frá Heilsutrygd um millum annað møguleikan fyri øktum fleksibiliteti í skipanini, men tíverri eru vit ivasom um hesar útsagnir, inntil ovasti politiski myndugleikin hevur gjørt hesa støðuna heilt greiða.

Við fleiri kommunulæknum í einari skipan við munandi øktum fleksibiliteti, skapa vit fortreytirnar fyri eini nýtímans og nøktandi kommunulæknaskipan. Tá fáa vit eina skipan, har teir núverandi dugnaligu læknarnir halda fram í sínum yrki, og næsta ættarliðið av læknum við góðari samvitsku kann átaka sær at hava væl umhugsaðar og kvalifiseraðar sjúklingaviðtalur. Harvið kunnu vit í størri mun tryggja, at vit øll fáa røttu viðgerð í heilsuverkinum, sum tað sømir seg í einum framkomnum vælferðarsamfelagi.

 

Vinarliga

komandi kommunulæknar

 

Marin í Dali                          Brynhild Hanusardóttir Reinert                   Ester Weihe Jacobsen

Jenny Jónsdóttir Nielsen       Jenny Østerø í Jákupsstovu                         Jón Rói Jacobsen

Katrina Clementsen              Sólfríð Jacobsen                                         Ásla Joensen

Lýsing
Seinastu tíðindini
Nýggjur bygningur til Fróðskaparsetrið
Skotiđ viđ Magnus Jørmundsson
Nú kemur umstrídda lógaruppskotið
Pál Weihe í Sandvágs kirkju
Sløkkja ljósini í ein tíma
Hotel Hafnia og Hotel Brandan hava gjørt…
Peningastov­nar gera mismun á fólki
Norðlýsið á gøtuni
Magni Christiansen konsert á Eiði
Nýggj vísindagrein í Ocean Engineering
Á leið sama umsøkjaratal á miðnámi
Dýrari tunlar enn neyðugt
Magnus Jørmundsson vitjar Skotið
Heilsuhjálpara­felag Føroya
Nær síggjast úrslit av allari ferðing­ini…
Jógvan Fríðriksson, bispur, prestur til…
Brúkar tú blinkaran?
Fíggjarlógar­arbeiðið úr einum javnstøðus…
Tøkk - Maria Sofía Skærtóra Viðoy
Fimleikafagnaður: Myndarøð partur 5