So lítið skilti partarnar
Norðlýsið skilir, at Framsókn setti sum treyt fyri at koma í samgongu við Sambandsflokkin og Javnaðarflokkin, at ríkisveitingin skuldi lækkast við 60 milliónum. Hetta skuldi gerast yvir alt valskeiðið, og hevði tí verið í miðal 15 milliónir um árið.
Keldurnar hjá Norðlýsinum siga, at Sambandsflokkurin kundi ganga við til 40 milliónir, sum so høvdu verið 10 milliónir um árið. Tað, sum skilti partarnar, var sostatt einans 20 milliónir yvir 4 ár ella 5 milliónir árliga, ið er minni enn ein promilla av fíggjarlógini. Javnaðarflokkurin hevði ongar innvendingar og kundi góðtaka tað, sum hinir báðir komu til sættis um – um teir komu til sættis.
Men hendan lítla upphæddin var kortini eftir øllum at døma nokk til at vátt kom í reiðrið millum Sambandsflokkin og Framsókn.