Veðrið næsta samdøgrið
Veðrið í løtuni (klokkan er 16) er soleiðis, at tað er ymiskt við bæði ætt og vindferð kring landið. Norðanfyri er landnyrðingur, 5 til 10 m/s, skýggjað og eitt sindur av kavaavfalli. Fara vit suðureftir, er ættin nærri eystri, og vindurin upp í 13 til 18 m/s. Har er eisini skýggjað og eitt sindur av kavaavfalli. Hitin kring landið liggur úr minus 3 upp í pluss 2 stig.
Vindurin fer at veksa so við og við í kvøld, frá tí sum er nú upp í 15 til 20 m/s á midnátt. Alla tíðina skýggjað og kavaæl, tó er farið at regna sunnanfyri. Hetta regnumráði fer at troka kavaælingarnar norðurum, so tá ið komið er til klokkan 08 í morgin ári, er regn kring alt landið, og vindurin um 15 til 20 m/s. Onkra løtu eitt sindur meiri, 18 til 23 m/s.
Út á fyrrapartin í morgin fer vindurin at minka eitt sindur, á middegi eru 13 til 18 m/s av eystri, meðan tað framvegis regnar.
Tá ið nakað er liðið út á seinnapartin, helst seint seinnapartin, fer at slíta í eina løtu, meðan ættin lækkar niður í sunnan, og vindurin minkar niður í 3 til 8 m/s. Um kvøldið regnar aftur.
Hitin í morgin fer at veksa úr 3-4 stigum um morgunin upp ímóti 10 stigum um kvøldið.