Lýsing
Lýsing
Lýsing
Mynd: Oliver Joensen

Hvør hevur ábyrgdina av at grava kava?

SKRIVAÐ: Jóhann Lützen  |  17.01.2023 - 08:25 Leiðarin Tíðindi

Hann sigur nógvan kava nú í vikuni omaná tann nógva kavan, sum longu er komin. Bæði myndugleikar og borgarar eiga at gera sítt til, at ferðslan ikki verður tarnað óneyðuga.

 

Um vikuskiftið kom tað óvart á mong, at so nógvur kavi kom niður, og fleiri bilar hava staðið fastir í tímavís um vikuskiftið. Ja, sum vórðu farin út at koyra leygarkvøldið vórðu ikki grivin leys fyrrenn klokkan seks sunnumorgunin. Í Klaksvík fingu býarbussarnir ikki koyrt mánadagin 16. januar, og tað frættist, at heilt mong gjørdust ov sein í skúla og til arbeiðis mánamorgunin.

Landsverk hevur ábyrgd av at grava og salta landsvegirnar, t.e. vegir millum býir og bygdir, herundir eisini tunnilsvegir. Sagt verður tó frá, at tað ger lítlan mun at salta, sum veðrið er nú, tí saltið liggur leingi oman á ísinum, áðrenn tað byrjar at eta seg niður ígjøgnum, og til ta tíð kann tað verða fokið omanav og av vegnum. Grevsturin gongst tó væl, og hóast tað til summar tíðir er bíðitíð, leggur Landsverk nógv fyri at hava vegirnar millum bygdir opnar.

Kommunurnar hava ábyrgd av at grava kommunalu vegirnar inni í bygdum øki. Her verður javnan ilskast inn á, at vegirnir ikki eru nóg væl grivnir, men tað er ikki altíð, at kommunan kann lastast fyri tað. Til tíðir standa bilar til fortreð úti á vegunum, og teir gera, at gravimaskinan ikki fær grivið. Tí eiga borgarar at hyggja at og hugsa um, hvørt teirra bilur møguliga stendur til bága fyri gravimaskinurnar hjá kommuni, og um so er, so flyta bilin. Kommunan varðar av býarbusskoyringini, sum ikki hevur koyrt ígjár og í dag. Hetta tykist at verða ein løgin raðfesting. 

Borgarin hevur ábyrgdina av at grava inni á egnum grundstykki. Til nýggj hús, tað vil siga hús, ið eru umleið 30 ár, er vanliga krav um, at rúm er fyri at hava tvey parkeringspláss inni á grundstykkinum (kravið varierar nakað). Hús eldri enn tað eru ikki umfatað av sama kravi. Men her eiga vit at hjálpast at við at flyta bilarnar burtur av alfaravegi, har tað ber til, so maskinurnar fáa grivið.

Á vegastrekkjum, har tað ikki ber til at hava bæði sporini frí fyri bilar, eigur bilarnir altíð at standa í somu síðu av vegnum og ikki í báðum síðum, sum onkrastaðni sæst.

Borgarin hevur somuleiðis eisini ábyrgd av at grava fyri gangandi fólki á egnum grundstykki. Tað skal vera framkomandi og høgligt fyri postboðini at sleppa til postkassan hjá fólki, eins og tað sama er galdandi, tá bilarnir hjá IRF koma eftir ruski. Grivið skal vera, so tað er ómakaleyst at avheinta burturkastið. Leggjast kann afturat, at um persónur kemur til skaða vegna hálku inni á privatum grundøki, so kann eigarin av grundøkinum ábyrgdast fyri tað.

Eisini eiga fólk at taka áheitanirnar frá myndugleikunum til eftirtektar. Tá løgreglan, Landsverk ella kommunan mælir frá koyring, so eigur einans at verða koyrt, um talan er um heilsuvanda ella lívsvanda, annars ikki. Løgreglan veit at siga, at tey eru alt ov mong í tali, ið ikki fylgja ávísingunum og fara út at koyra, hóast tað ikki er ráðiligt, og hóast tað er óneyðugt. Tað kann vera til stóran bága fyri onnur ferðandi, herundir bæði neyðsynjarakfør og maskinur, ið fáast við kavagrevstur. Harumframt er tað eisini til bága fyri tann ella tey, ið ið skulu brúka tíð og orku uppá at fáa bilarnar leysar aftur. Farið tí ikki út at koyra, tá tað verður frárætt, uttan um talan er um neyðstøðu.

Latum okkum øll gera okkara til at hjálpa myndugleikunum við at halda vegirnar opnar.

Lýsing
Seinastu tíðindini
Stjørnan á veg norður úr Vági við tveimu…
Tí hevur HB meldað avboð til Klaksvíkska…
Tríggir dagar við friði og ongari telefo…
Ein eyðkendur viðingur við Garðavegin
U10 hjá Team Klaksvík er í steypafinalun…
KÍ og Víkingur, kvinnur, í venjingardyst…
Teir fiskaðu væl í nátt
Størst avreiðingarvirði í bólki 4T í 202…
Myndir í trúnni
Úr bakskuti í framskut
Vitjan av lands­stýris­manninum
KÍ vann á Eiði
9 nýggir lærlingar í Articon
Føroysk framleiðsla í 135 ár
Luc Kassi fær sáttmála við KÍ
Veðrið um vikuskiftið
Heilsufótbóltur aftur á skrá
Hevur tú fingið spurnarblað?
Ert tú ”gudiligur”
Nógv spennandi á skrá hjá LGBT+ Føroyum