Nýggju eigararnir av reiðarínum Ruth verða fyritøkurnar Beinur, Asbjørn og AB Ocean. Í reiðarínum Beinur er ein annar føroyingur, Fríðálvur Tindskarð, so Ruth fer ikki heilt av føroyskum hondum. Men Gullak Madsen hevði allarhelst viljað, at hansara tríggjar døtur kundu tikið yvir eftir hann. Tað er bara ikki ein møguleiki í danska samfelagnum í dag.

- “Tað er ongin loyna, at eg helst hevði viljað sæð næsta ættarliðið fingið møguleika at rikið okkara reiðarí víðari. Eg havi tríggjar fantastiskar døtur, og tær hava allar tríggjar førleikarnar og viljan til at halda fram við fyritøkuni”, sigur Gullak Madsen. “Men tær eru ikki “fiskere på dækket”, og er ein ikki tað, er tað ikki loyvt at eiga eitt fiskifar”.

Víðari sigur Gullak Madsen við Nordjyske, at “tað er harmiligt, at vit í Danmark í 2023 ikki hava karmar og vilkor, ið tiltrekkja tey, sum duga og vilja fiskivinnuna. Tað ger okkum veikari í kappingini við restina av heiminum, og vit diskriminera eisini ímóti teimum menniskjunum, ið kanska ikki hava neyðuga fysikkin til at standa á skipsdekki”, sigur Gullak, og stúrir fyri komandi ættarliðum í so máta. 

Gullak Madsen er sum nevnt 77-ára gamal og býr í sethúsum í Hirtshals saman við familju síni.