Einki brúgvalag við regni sæst nærkast Føroyum hetta til leygardagin. Hetta merkir einki samanhangandi regn ella ælaveður. Tó kann okkurt lokalt regn ella sirm verða í vikuni, har sum fjøllini tvinga luftina uppum.

Orsøkina til hetta góða veðrið er eitt hátrýst, sum stendur yvir Skandivania alla vikuna. Eitt veikt luftrák er tí ímóti Føroyum sunnaneftir ella av landsynningi. Luftin hevur sín uppruna í Suðursvøríki. Hon tekur vætu í seg yvir havinum á vegnum hendanvegin, men tó ikki líka nógv, sum tað hevði verið, um hon kom hertil av útsynningi. Tí er skiftandi skýloft ella smáskýggjað við sól ella sólglottum næstu 5 dagarnar – og møguleikin fyri mjørka er eisini, har sum ættin er til tað.  

Veðrið í vikuni - dag fyri dag:

Mánadagin:

3 til 8 m/s av suðuri, samdrigið ella skiftandi skýloft í morgun, í støðum tám ella mjørki. Eitt skifti fyrrapartin eitt sindur klárari. Okkurt ælið hevur verið í morgun, og okkurt einstakt kann væntast í støðum í dag – okkurt lokalt fyribrigdi, men ikki nógv. Einki brúgvalag í dag við regni ella ælaveðri. Hitin í dag fer upp í 10-11 stig, í støðum 12 stig.

Týsdagin:

3 til 8 m/s sunnan í nátt, men út á morgunin minkar vindurin niður í eitt lítið lot, minni enn 5 m/s. Allan dagin er skýloftið skiftandi, so sólin kemur fram í støðum – í aðrar mátar fyri tað allarmesta turt. Hitin í morgin fer at liggja um 7 til 12 stig.

Mikudagin:

Eitt lítið lot av landsynningi suðuri, minni enn 5 m/s, smáskýggjað ella klárt og fyri tað allar mesta turt. Hitin niður í 4 stig um náttina og upp í 12 stig í støðum um dagin.

Hósdagin:

Lítið lot av landsynningi, minni enn 5 m/s. Smáskýggjað ella klárt við sól ella sólglottum. Hitin niður í 4-5 stig um náttina og upp í 11-12 stig í støðum um dagin.

Fríggjadagin:

Eitt lítið lot, undir 4 m/s, av landsynningi og eystri, smáskýggjað ella klárt við sól ella sólglottum. Hitin niður í 4-5 stig um náttina og upp í 11-12 stig í støðum um dagin.