Dysturin í Runavík var merktur av keðiliga veðrinum. Tað var spælandi eftir vanliga mátistokkinum, men serliga KÍ dugdi ikki serliga væl at spæla í hesum líkindunum. KÍ hevði mótvind í fyrra hálvleiki og seinna part av hálvleikinum var bólturin nærum bara á KÍ-hálvuni. Undan hesum fekk KÍ eitt gott mál, sum Jonn Johannessen skoraði. Aron Knudsen javnaði stutt eftir til hálvleiksstøðuna 1-1.

NSÍ dugdi betri at spæla í mótvindinum og gjørdi tað skilagóða at leggja trýst langt frammi á vøllinum, og tað gjørdi, at KÍ sjáldan fekk skipað nakað trýst inni á NSÍ-hálvuni. NSÍ hevði stórar møguleikar at skora til 2-1 bæði í fyrra hálvleiki og seinna hálvleiki, men hvørki Brandur H. Olsen ella Klæmint A. Olsen megnaðu at skora. Ístaðin fór KÍ avstað við øllum móti endanum, tá René S. Joensen skoraði eftir innlegg úr høgru. René hevur víst seg at verða ein góð loysn uppá vinstra bakk plássið hjá KÍ. 2-1 til KÍ gjørdist úrslitið. Munurin á liðunum var, at KÍ dugdi betri at gagnnýta sínar møguleikar, sum samanlagt helst vóru færri enn teir hjá NSÍ.

Sera stór áskoðarafjøld var møtt til dystin og eiga bæði Bláa Bylgjan og Guliganz rós uppiborið fyri at seta ein sera góðan dám á dystin. Liðini vóru sera tendrað og gav tað nakrar undirhaldandi rokstøður, har alt tó legði seg aftur. Dómarin, Jóhan Hendrik Ellefsen, mundi samanlagt koma væl frá truplu uppgávuni.

KÍ tryggjaði sær ein týdningarmiklan sigur og liggur nú einsamalt á odda í deildini eftir fyrsta triðing.