Stór broyting í veðrinum í vikuskiftinum
Í hesum døgum er veðrið gott. Vit liggja undir einum hátrýsti, sólin hevur sæð og hitalagið hevur ligið um 13-15 stig í fleiri støðum. Tað byrjaði fyri nøkrum døgum síðan við gráligum veðri, skýggjað og mjørki í støðum, men í dag er klárt kring alt landið, á myndum, tiknar úr fylgisveinum, síggjast eingi skýggj, bert frostrípur eftir flogførum langt uppi.
Teir næstu dagarnar fer hátrýstið vestureftir og fer at leggja seg við Eysturgrønland. Hetta merkir, at vit fara at fáa eitt kaldari luftrák ímóti Føroyum av útnyrðingi og norði.
Í forsøgnini fyri vikuskiftið sæst ælaveður við bæði regni og vátakava, og hitin fer niður ímóti frostmarkinum.
Tað kalda veðrið fer sambært forsøgnunum at halda fram inn í næstu viku, men tíbetur verður ikki nógvur vindur ella serliga nógv kavaæl.