(Grein úr blaðnum)

Framsýningin verður í 2 dagar, leygardagin og sunnudagin á Norðoyastevnu, og øll, sum vilja, kunnu koma og sýna fram. Rotary hevur onga avmarking á nøgd av listarverkum, so listarfólki stendur frítt at sýna fram á framsýningini. Rotary tekur 20% av søluni, og teir pengarnir fara til vælgerandi endamál. 

Rotary er ein felagsskapur, ið roynir at savna inn pening til vælgerandi endamál. Í seinastuni hevur felagsskapurin savnað inn til Ukraina, eitt nú til ein generator, og hetta verður gjørt saman við Rotary Danmark. Somuleiðis stuðlar Rotary skiftisnæmingum (ella útvekslingsstudentum, sum tað eisini eitur), bæði næmingum, ið fara til útlond, og næmingum, ið koma til Føroya. Eisini stuðlar Klaksvíkar Rotary-klubbi eitt nú Beranum og øðrum tiltøkum í Føroyum.

Tilsamans eru 18 limir í Klaksvíkar Rotary-klubba, og teir møtast hvønn týsdag at hava fund, og eisini fer felagsskapurin á virkisvitjanir kring landið. Atgongumerkið kostar 50 krónur, og framsýningin er í miðhøllini á Skúlatrøð. Í fjør vóru 108 listarverk við á framsýningini. 

Leygardagin á Norðoyastevnu, 3. juni, er opið kl. 16-20, og sunnudagin 4. juni er opið kl. 15-20.

Um onkur, ið lesur hetta, vil hava sítt listarverk við á framsýningina, skal boðast frá í seinasta lagi mikudagin 31. mai til annaðhvørt Jørgin Vágslíð á tlf. 210102 ella teldupostinum jorginv@tsk.fo, ella Palla Ziskason á tlf. 217739 ella á teldupostinum palli@ziskason.com. Listarverkini skulu latast inn í Miðhøllini á Skúlatrøð hósdagin 1. juni millum kl. 16 og 18. Sagt verður frá, at listarverkini skulu vera greið at heingja upp og hava skelti við heiti og kostnaði á hvørjum einstøkum málningi. Rotary tilskilar sær eisini rætt til at velja millum myndirnar.