Hóast tað er komið fram, at tølini, sum Landsstýrið grundgav síni tiltøk ímóti Russlandi við hósdagin í farnu viku, eru skeiv, so hevur tað ikki fingið Landsstýrið til at taka aftur ella endurskoða sínar ætlanir um sanktiónir. Uttanlandsnevndin heldur tí fram við at viðgera uppskotið frá Landsstýrinum um heimild at seta sanktiónirnar í verk, uttan at tær verða lagdar fyri samlaða Løgtingið at taka støðu til.

Ein fyritøka, ið verður meint rakt av einum móttiltaki frá russiskari síðu, er Pelagos í Fuglafirði, ið útflytur fisk. Føroysku sanktiónirnar raka gamaní ikki útflutningin í sær sjálvum, eins og tær raka eitt nú føroyskar skipasmiðjur, men tað er óttin fyri aftursvarinum úr Russlandi, sum fær stjóran í Pelagos at biðja Uttanlandsnevndina um at hugsa seg sera væl um enn einaferð. Føroya Reiðarafelag og Verksmiðjutrolarar, Faroe Agency, Mest, Pelagos og Kommunufelagið hava verið á fundi við Uttanlandsnevndina í dag.

Pelagos útflytur í dag millum 40% og 60% av síni framleiðslu til Russlands.

Formaðurin í Uttanlandsnevndini, Bjarni Hammer úr Javnaðarflokkinum, sigur, at í næstu viku verður álitið hjá nevndini um uppskotið frá Landsstýrinum klárt.