Samdrigið er í morgun – t.e. at skýggj fjala alt loftið, einki hol er upp ígjøgnum. Tað regnar kring alt landið, tó at tað ikki regnar líka illa alla tíðina. Hitin liggur um 8 – 9 stig.

Orsøkina til keðiliga veðrið er eitt lágtrýst, sum í morgun er einar 100 fjórðingar ella minni í landsynning úr Suðuroynni. Trýstið í miðjuni er 974 hPa, og tað er nokkso lágt, og tí er nakað av vindi rundan um tað. Mesti vindurin er vestan- og norðanfyri miðjuna – akkurát har sum Føroyar eru!

Lágtrýstið við brúgvaløgum liggur um okkara leiðir. Vit liggja vestan fyri miðjuna, har sum mesti vindurin og mesta regnið er.

Hvussu veðrið fer at vera restina av degnum í dag og í morgin velst alt um, hvønn vegin lágtrýstið fer, og um tað dýpist ella grynnist.

Lágtrýstið fer í dag at ganga í landsynning – tað er ímóti Hetlandi og burtur frá okkum – meðan tað grynnist spakuliga. Tað fer ikki at ganga so skjótt fyri seg, og veðrið í Føroyum fer tí ikki at batna so skjótt.

Forsøgnin fyri Føroyar er, at vindurin sum er í morgin fer at vera allan dagm men ættin fer út á dagin upp í beinan norðan. Tað verður líka grátt í veðrinum allan dag, og tað fer at regna fyri tað mesta kring alt landið – tó verða løtur við ongum regni onkra løtu.

Hitin í dag fer at koma upp í eini 10 – 11 stig.