Í nøkur ár hevur ECA, sum umboðar flestu stóru feløgini í Evropa, havt avtalu við UEFA um, at fyri hvønn dyst sum ein leikari stendur á dómaraseðlanum til ein landsdyst í EM-undankapping ella Nations League, so fær felagið, ið hann umboðar, eina peningaupphædd. Hendan upphæddin hevur ligið áleið millum 27.000 og 30.000. Hetta umfatar ikki venjingardystir og ikki HM-undankappingardystir, har FIFA er fyriskipari.

Átta dystir í 2023

Tað er eitt krav til landsliðini hjá UEFA, at tey skulu spæla 10 landsdystir um árið. Hetta hevur m.a. nakað við sjónvarpsrættindi o.a. at gera. Í ár háttaði lutakastið seg soleiðis, at Føroyar komu í ein bólk við fimm liðum. Sostatt eru átta EM-undankappingardystir og tveir venjingardystir í 2023.

Ein knøpp millión til KÍ

Við síðstu landsliðsúttøkuni móti Albania hevur KÍ tilsamans havt 35 ferðir leikarar á dómaraseðlanum til EM-undankappingardystir í 2023. Síðstu kapping gav tað áleið 27.000 kr. pr. dyst á dómaraseðlanum, og vit ganga útfrá, at upphæddin verður tann sama í 2023. Hon broytist vanliga ikki nógv frá kapping til kapping. Tað merkir, at KÍ fær áleið 945.000 kr. í landsliðspengum í 2023. Tað er tað mesta sum nakað felag fær. Men HB og B36 liggja ikki so langt aftanfyri, men liðið sum er endað nr. 2 síðstu tvey árini, ikki er á hædd við hini enn. Har skal sigast, at Víkingur ofta hevur flestar U21-landsliðsleikarar. Teir geva ikki pengar, men tað kundi bent á fleiri pengar í framtíðini, tá hesir blíva ov gamlir til A-landsliðið.

Yvirlitið yvir landsliðspengar 2023:

945.000 kr.: KÍ

810.000: HB

783.000: B36

459.000: Víkingur

54.000: TB

Restin fer til feløg uttanlands.

KÍ hevur havt hesar leikarar á dómaraseðlanum 2023:

8 dystir: Odmar Færø, René S. Joensen og Jákup B. Andreasen

5: Jóannes K. Danielsen

3: Heini Vatnsdal

2: Mads B. Mikkelsen

1: Páll A. Klettskarð

Í yvirlitinum er tikið sum givið, at Jóannes K. Danielsen, Odmar Færø, René S. Joensen, Jákup B. Andreasen og Mads B. Mikkelsen verða á dómaraseðlanum móti Albania, har teir eru úttiknir.