Norðlýsið hevur hugt í fíggjarlógaruppskotið hjá Ruth Vang, og har er ringt at síggja nakran felags mentanarpolitikk, tá tað kemur til at veita mentanarhúsum í Føroyum fíggjarligan stuðul. Ruth Vang skjýtur fyri 2024 upp at veita verkætlanini Saltsilo kr. 2.500.000, Mentanarhúsinum í Fuglafirði 300.000 í stuðulsjáttan, Norðurlandahúsinum í Tórshavn kr. 1.700.000 í stuðulsjáttan, Tjóðpalli Føroya, sum húsast í Tórshavn, 6.527.000 í stuðulsjáttan, Tjóðleikhúsinum í Tórshavn 6.000.000 í løgujáttan og Víkingagarðinum í Hovi 100.000 krónur í stuðulsjáttan.

Kelda til omanfyristandandi: https://www.logting.fo/mal/mal/?id=10549 > Skjøl > Upprunauppskot.

So tað er ikki tí at Landsstýrið hevur ein generellan politikk um ikki at stuðla mentanarhúsum, at tey hava valt at bróta lyftið til Varpið. Heldur tykist Varpið knappliga at verða valt frá, meðan hini mentanarhúsini framvegis fáa sítt.

Lyftið var at játta tilsamans 17 mió. kr. til Varpið, býtt á ár soleiðis: 5 mió. kr. í 2022, 7 mió. kr. í 2023 og 5 mió. kr. í 2024. Tær fyrstu 12 milliónirnar eru játtaðar, og av teimum eru 10,8 útgoldnar. Men í fíggjarlógaruppskotinum fyri 2024 standa tær seinastu 5 milliónirnar, sum vórðu lovaðar, ikki á. Hetta hava millum onnur undanfarnu tinglimirnir Frimodt Rasmuseen og Bill Justinussen alment vátta. 

Tað er sera hugstoytt at eygleiða, at eftir at eldsálir hava fingið Varpið upp at koyra við áliti á, at Føroya Landsstýri fór at halda sítt orð, at fólkini í so tignarligum embætum sum landsstýrissessirnir áttu at verið, ongar skruplur hava við at leypa frá gjørdum avtalum og givnum lyftum og lata álitisfullu fólkini handan sólskinssøguna Varpið hanga í stórari óvissu fyri framtíðini.

3. og seinasta viðgerð av løgtingsfíggjarlógini fyri 2024 er mánadagin 18. desember kl. 10, og úr tinginum frættist, at løgtingslimir úr Norðoyggjum leggja eitt broytingaruppskot fram um at játta tann pening, sum lovaður varð.