Eftir at lágtrýstið, sum liggur beint yvir okkum í dag, er farið eysturum, fer eitt hátrýst at leggja seg yvir okkara leiðir. Hátrýst veður er vanliga gott veður við lítlum vindi og avfalli, og loftið er sum oftast klárt.

Sunnudagin og nakrar dagar inn í næstu viku fara vit at hava lítlan vind og lítið ella einki avfall. Tað bláa loftið fáa vit ikki á hesum sinni. Tað má bíða til eina aðru ferð.

Nú seinnapartin er minni vindur, enn tað var í morgun. Vindferðin er 3 til 8 m/s av eystri, tað er skýggjað kring alt landið og regn ella ælaveður. Hitin liggur um 7 stig.

Hetta verður tað, til einaferð seint í kvøld. Tá minkar vindurin niður í eitt lítið lot, minni enn 5 m/s, og so støkkur hann upp í útnyrðing – beint ta øvugtu ættina. Vindferðin fer upp í 8 til 13 m/s, og enn skýggjað og regn ella ælaveður.

Hetta er byrjanin til endan an váta veðrinum, vit hava havt nokkso leingi, tí fram ímóti morgni minkar vindurin, og tað slítur í. Frá morgni av og frameftir eru 3 til 8 m/s av útnyrðingi, samdrigið og yvirhøvur turt. Hitin í morgin fer at liggja úr 6 stigum niður í 2 stig.  

Sunnudagin er minni vindur – bert eitt lítið lot, minni enn 5 m/s. Ættin fer at liggja um útnyrðing um náttina, men út á fyrrapartin fer hann at mala av ymsum ættum, og tað ger hann til seint seinnapartin ella tíðliga um kvøldið. Tá kemur hann av suðuri. Allan dagin smáskýggjað og yvirhøvur turt. Hitin sunnudagin úr 2 stigum upp í 6 stig.  

Gott vikuskifti.