Í fjør heyst læt Atlantsflog upp nýggja farleið til New York (“First we take Manhattan”), og tjóðarflogfelagið hevur stórt rós uppiborið fyri sín leiklut í at flúgva okkara úrmælingar og túsundtals fjepparar til Berlin at skriva føroyska søgu. Óansæð úrslitið vita vit, at hondbóltshetjurnar fara at gera tjóðina stolta. 

Dystirnir eru ikki spældir, tá hesar reglur eru skrivaðar, men søgu hava hondbóltsgarparnir longu skrivað við í heila tikið at vera við. Tað er óhoyrt, at eitt so lítið land kann fostra so nógvar úrmælingar í heimsflokki. Og undirtøkan svarar til, at øll Suðuroyggin ella allar Norðoyggjar vóru manntómar undir dystunum, nakað sum valla kann vera annað enn enn ein sensatión í heimsflokki.

Komið er nú eitt nýtt ár, og tað sær mikið spennandi út. Um ein góðan mánað fara vit inn í Torra, Mentanarhúsið Varpið spílar seg út við Landbúnaðarráðstevnu, síðani byrjar fótbólturin og nakað seinni kappróðurin aftur, Norðoyastevna verður aftur, Flokksmannadagar, Summarfestivalur, Sjómannadagar og Norðfestivalur. Norðoyggjar hava nú tiltøk allar ársins tíðir – uttan líka á heysti. Men heystið 2024 verður øðrvísi, tí í heyst verða spildurnýggju tunlarnir Norður um Fjall lidnir, og tað skal undra, um tað ikki verður við buldur og brak. 

Seinast í farna ári fekk Sandoyggin loksins fast samband við 6 aðrar samanhangandi oyggjar, og innan leingi fer Leirvíkstunnilin frá 1985 at vera tann elsti teinurin á farleiðini frá Dali til Viðareiðis. Tað hevði valla nakar ímyndað sær fyri bert nøkrum árum síðani. Og sjálvsagt eiga vit ikki at støðga her, men halda á til Suðuroynna, so skjótt tað ber til. 

2024 verður eisini árið, tá spakin verður settur í til glæsiliga fýrastjørnaða hotellið við Biskupstorg, og skal tað eftir ætlan standa liðugt seinast komandi ár. Hotellið er bæði kærkomið og tiltrongt; tað hevur veruliga manglað eitt gistingarhús í hesum formatinum. Tá tað er komið, fer ferðavinnan í Norðoyggjum at hava framúr góðar karmar. 

Sum heild sær 2024 bjart út, ítróttarliga eins væl og samferðsluliga, og politiskt verður árið eisini spennandi. Vit fara nevniliga at hava kommunuval komandi november, og altjóðapolitiskt verða eisini forsetaval í USA og eftir øllum at døma í Bretlandi eisini. Eisini í Russlandi verður val, tó fyrr í ár. Hesi valini, kommunuvalið kanska undantikið, kunnu fara at vísa seg at broyta geopolitiska veruleikan radikalt, og vit fara tí at fylgja væl við.

Tað er tí við góðum treysti og huga, at vit fara inn í 2024.