Seinna partin av vikuni fara tvey lágtrýst eystureftir tvørtur um Føroyar við skiftandi veðri. Leiðin er annaðhvørt beint tvørturum ella eitt sindur sunnanfyri. Tí verður skiftandi veður mikudagin til fríggjadagin – fleiri brúgvaløg fara eisini tvørturum, og tey hava bæði regn og vátakava við sær, í løtum kanska eisini kava.  

Mánadag:

5 til 10 m/ av landsynningi, skýggjað og okkurt ælið fyrrapartin og út á seinnapartin. Um kvøldið regn. Htini millum 3 og 6 stig.

Týsdag:

Eisini 5 til 10 m/s  av landsynningi, samdrigið og regn. Um kvøldið slítur í, og tað verður klárari. Um náttina veksur vindurin upp í 10 til 15 m/s, tað dregur samanumaftur og fer at regna. Hitin 4 til 7 stig.

Mikudag:

Minkandi vindur fyrrapartin, niður í 8 til 13 m/s eystan. Út á dagin minkar niður eitt lot av ymsum ættum, 3 til 8 m/s. Um kvøldið og náttina veksandi aftur upp í 8 til 13 m/s. Samdrigið stóran part av degnum, men í løtum smáskýggjað við sólglottum. Hitin millum 3 og 7 stig.

Hósdag:

Hann hækkar upp í útnyðring og minkar vindin niður í 5 til 10 m/s. Seinnapartin  fer hann eysturum til landnyrðing. Allan dagin samdrigið við ælaveðri við regni og vátakava ella kava. Hitin millum 3 og 6 stig.  

Fríggjadag:

Hann liggur enn av landnyrðingi, 8 til 13 m/s, samdrigið við ælaveðri við regni og vátakava ella kava. Hitin úr 2 stigum upp í 5 stig.