Eitt lágtrýst sunnan fyri Føroyar fer at gera okkum eitt sindur skiftandi veður í morgin, har vindferðin onkra løtu fer upp í skið, 15 m/s, men tað er so mesti vindurin alla vikuna.

Týsdagin og restina av vikuni fer lýggjari luft av evropeiska meginlandinum at reka ímóti Føroyum. Eitt hátrýst yvir sunnara parti av Svøríki fer at senda luftina hendanvegin. Vindferðin lítil, fleiri heilar dagar minni enn 5 m/s.

Hitalagið fer hesa vikuna at kvinka seg uppeftir. Sum kortini síggja út í kvøld, og um forsagnirnar halda, kunnu vit vænta okkum tvísiffraði tøl í endanum av vikuni.

Veðrið í vikuni – dag fyri dag:

Mánadagin:

Landnyrðingur allan dagin. Um náttina 8 til 13 m/s, og klárt ella smáskýggjað og yvirhøvur turt. Fram ímóti morgni veksur vindurin upp í 10 til 15 m/s, tað dregur á luftina, verður samdrigið og samregn. Í støðum kann vera vátakavi ella kavi uppií. Fram ímóti middegi minkar vindurin, og tá ið liðið er nakað út á seinnapartin, eru 5 til 10 m/s, enn samdrigið men ælaveður. Út á kvøldið minkar vindurin eitt sindur afturat. Hitin 4 til 8 stig.

Týsdagin:

Allan dagin fer hann at mala av ymsum ættum, vindferðin 4 m/s ella minni. Eitt sindur skýggjað um náttina, men so klárnar, og eftir tað og restina av degnum er smáskýggjað við sólglottum og í støðum klárt. Hitin týsdagin 4 til 10 stig.

Mikudagin:

Hann melur eina løtu av ymsum ættum um náttina, við lítlum vindi og klárum lofti, men fram ímóti morgni og restina av degnum fer hann at liggja av landnyrðingi, 3 til 8 m/s, samdrigið og yvirhøvur turt. Hitin mikudagin 4 til 9 stig.   

Hósdagin:

Eitt lítið lot av landnyrðingi um náttina og morgunin, minni enn 5 m/s, samdrigið og okkurt ælið. Seinnapartin og frameftir fer hann at liggja av eystri, 3 til 8 m/s. Skýloftið skiftandi restina av degnum, og onkur løta verður við avfalli. Hitin hósdagin 7 til 11 stig.  

Fríggjadagin:

Lítið lot av ymsum ættum, minni enn 5 m/s, klárt ella smáskýggjað við sólglottum. Hitin 7 til 12 stig.