Í tvey áratíggju hevur týski bólkurin ItaloBrothers skapt og spælt elektroniskan popptónleik, sum er farin um allan heimin. Løgini seta seg føst eftir ongari tíð, og á palli seta teir gongd á stórar poppveitslur, har fjøldin ikki at kann lata vera við at liva við.

Alt byrjaði í einum kjallara í friðarliga týska býnum Nordhorn í 2005, har ungu menninir Kris, Zachi og Matze funnu saman at stutleika sær við at gera tónleik. Fýra ár seinni fingu teir eitt risahitt við sanginum "Stamp on the Ground", sum framvegis telist millum teir kendastu elektronisku poppsangirnar.

Eftir hetta lá vegurin opin frammanfyri teir, og ItaloBrothes hava síðani skrivað, skapt, endurskapt og útgivið tónleik, umframt at teir hava spælt live um allan heimin.

Á Spotify hava teir yvir eina milliard spælingar, og á YouTube eru teirra video spæld meira enn 200 milliónir ferðir.

Hittini eru mong. Alt byrjaði við "Stamp on the Ground", og síðani hava teir eisini gjørt sangir sum "My Life is a Party", "This is Nightlife", "Rave Machine", "Live 4 Ever", "Summer Air" og fleiri.

Teir spæla stimbrandi og skiftandi Eurodance tónleik, sum við nútímans útsetingum kann savna ættarlið á festivalum, og nú eru teir klárir at taka landsins størsta tónleikapall.

ItaloBrothers spæla á Summar Festivalinum, sum verður hildin dagarnar 6. til 8. august.