Síðstu vikurnar hevur 48 ára gamli Espen Haug, sum frammanundan var hjálparvenjari, verið fyribils venjari hjá KÍ. Tað hevur gingið framá ímun til úrslitini frammanundan, men enn er grundarlagið tunt við einans trimum dystum.

Og nú tykist greitt, at Espen Haug verður høvuðsvenjari hjá KÍ framyvir. Hann hevur ikki lokna A-venjaraútgbúgving, hóast hann byrjaði uppá hesa fyri nøkrum árum síðani og hevur starvast sum høvuðsvenjari í Norra í 16 ár.

Nú arbeiðir KÍ sum skilst við at finna eina loysn, har Espen Haug fær m.a. gjørt sína venjaraútbúgving lidna innan stutta tíð, men í síðsta enda er tað avgerandi, at FSF góðtekur loysnina hjá KÍ. Og tá tað ljóðar, at Espen verður fastur høvuðsvenjari, so man KÍ hava fingið grønt ljós frá FSF fyri sínari loysn. Men ein annar møguleiki er, at venjaratoymið økist við einum venjara, sum hevur A-venjaraútbúgvingina.