– “Hetta hevur verið ein øgiliga, øgiliga góður dagur. Vit eru takksom fyri, at so mong fólk møttu upp til móttøkuna, vístu skannaranum áhuga og duga at síggja virðið í, at vit hava fingið ein tílíkan skannara til landið. Tilgongdin var at byrja við trilvandi, tað hevur staðið á viðhvørt, men vit hava dugað væl at samskipa og komu á mál, og tað eru vit øgiliga glað fyri.”, sigur Alexandra.

Spurd, um hon hevur lært nakað av tilgongdini við at fáa nýggja skannaran til høldar, svarar Alexandra á Dul soleiðis:

– “Ja, at man skal ongantíð geva upp! Um ein trýr uppá sakina, so skal man halda áfram og røkka henni. Tað er eisini øgiliga umráðandi at man, tá man er í eini tílíkari tilgongd, eisini hvílir í sær sjálvari og ger tað, ein heldur vera rætt”, sigur sjúkrahússtjórin.

Ovurstóra uppmøtingin vísir bæði, at tað er eitt týdningarmikið amboð, sum her er fingið til vega, men eisini, at Klaksvíkar Sjúkrahús eigur stóran stuðul í fólkinum. Alexandra sigur:

– “Uppbakningurin frá fólkinum her norðuri hevur altíð verið góður, og tað gleðast vit um. Beint nú eru ongar ætlanir um at seta nýtt virksemi í gongd, men í staðin verður arbeitt við at fáa hendan skannaran upp at koyra og fáa sjúklingar ígjøgnum. Tað, sum vit síggja fyri okkum, er at menn, sum skulu kannast fyri prostatakrabba, sleppa skjótt framat og um neyðugt fáa skjóta viðgerð. Tað hevur hægsta prioritetin í løtuni”, og leggur afturat:

– “Í tølum verður mett, at millum 8 og 10 skanningar fara at verða gjørdar um dagin, tó nakað færri at byrja við, tí starvsfólkini skulu fyrst fáa rutinuna. Ein knæskanning tekur til dømis 4 til 9 minuttir, so um ein er nóg effektivur, so ber til at fáa nógv frá hondini upp á ein dag”, sigur Alexandra á Dul at enda.