Heini Dai Jørgensen fekk debut
Vágamaðurin fekk sínar fyrstu minuttir í bestu deildini í gjár.
KÍ-viðhaldsfólk, ið hava verið til venjingar í ár, hava ofta sæð, at ein ungur ’’ókendur’’ føroyingur hevur verið millum leikararnar. Men við tíðini er hann blivin meira kendur og hann hevur eisini spælt fast við næstbesta liðnum í ár. Talan er um 17 ára gamla Heina Dai Jørgensen, sum gongur á TSK í Klaksvík.
Sum Norðlýsið skilir, so gjørdi KÍ sáttmála við hann í síðstu viku eftir, at 07 Vestur hevði fingið uppalingarpengar fyri hann. Og nú KÍ, sum ikki hevði fullmannaðan bonk í gjár, manglaði 12 leikarar til EB/Streymadystin í gjár og liggja til at mangla millum 15 og 17 leikarar móti HB komandi sunnudag, so er møguleikin komin til Heina.
Heini fekk síðstu 14 minuttirnar á vinstra vongi í gjár. Hann var við í uppspælinum til sigursmálið, og átti góða innleggið til annan av stóru málmøguleikunum hjá Árna Frederiksberg móti endanum av dystinum.