1.deild hjá KÍ vann á toppliði
1.deild hjá KÍ er vaknað, og tað helst beint áðrenn ov seint var.
Næstbesta liðið hjá KÍ hevur havt eitt vánaligt kappingarár. Tí spurdu vit í grein uppundir FC Hoyvík dystin, um KÍ vildi varðveita næstbesta liðið. Tí í besta hópinum eru fyri tíðina nokk av leikarum at senda niður og tað er bara loyvt fram til og við 24. umfar.
Men KÍ er vaknað og við styrki frá leikarunum, sum sita á bonkinum á besta liðnum, so eydnaðist tað at vinna botndystin móti FC Hoyvík, hóast hepni var við. Og í kvøld vann KÍ á útivølli móti B36, sum kappast um at vinna næstbestu deildina. KÍ vann 2-0. Málini skoraðu Kristoffur Jakobsen (brotsspark) og Joseph M. Williams. Við sigrinum er KÍ á 8. plássi sjey stig frammanfyri FC Hoyvík, sum tó hevur leikt ein dyst færri.