Vit eru nógv, ið hava góð hjartamál og hugskot, men tað er umráðandi, at vit fáa eina rødd, sum hoyrist í býráðnum og ger mun. 

Klaksvíkar kommuna skal standa í fremstu røð. Tað skal vera gott og trygt at búgva her.
Eg komi næstu vikurnar, at greiða nærri frá mínum hjartamálum. Eg vil millum annað arbeiða fyri, at:

• Betra um korini hjá barnafamiljum. 
• Skapa trygga og góða ferðslu.
• Skapa betri trivnað í kommununi.
• Betra um samskiftið millum kommunu og vinnu. 
• Skapa betri karmar hjá eldraøkinum og heilsuøkinum. 
• Fáa nýggja fimleikahøll.
• Fáa bíligar leigubústaðir til lesandi og lærlingar.

Eg trúgvi uppá, at vit kunnu skapa betri umstøður fyri øll, um vit saman arbeiða at økja trivnaðin, javnrættindini og møguleikarnar í okkara býi.

Mítt mál er at ávirka ein jaligan hugburð í býráðnum, har hugskot kunnu blóma, so vit tryggja, at hvør einasti borgari, ung sum eldri, frísk sum sjúk, kunnu vera hoyrd og sædd. 

Fyri at fremja hetta er umráðandi, at vit fáa nýggjan íblástur og nýhugsan inn í arbeiðsætlanina hjá býráðnum, sum kunnu taka bæði eyðkenni og tørv í samrøðuna. 

Eg vil arbeiði hart fyri at seta broytingar í verk, ið spegla tørvin í okkara samfelag.

Latið okkum saman arbeiða fyri, at skapa eitt meira greitt, opið og fevnandi politiskt umhvørvi, har hvør borgari hevur eina ávirkan. Tí saman kunnu vit gera mun.

EITT SINDUR UM MEG

Eg eri 31 ára gomul. Gift við Atla Henriksen og saman eiga vit tríggjar gentir, Eydna, Petra Lovisa og Lilja, sum eru 7, 6 og 3 ár.

Eg havi seinastu sjey árini verið sjálvstøðugt vinnurekandi og eigi og reki eg Madame Vælveru, sum heldur til í Biskupstorginum.

Eg eri errin av, at reka mína egnu fyritøku í Klaksvík. Vinnan stendur í blóma og við einum staðbundnum búskapi kann vinnan vera sambindingarliðurin til trivnað, vøkstur og vælferð í okkara kommunu.

Í mínum arbeiði royni eg at skapa møguleikar, sum ikki einans gagnar míni egnu fyritøku, men aðrar fyritøkur rundan um meg og býin sum heild. 

Sum vinnurekandi eri eg saman við nógvum fólkum hvønn dag, sum eg haldi vera spennandi og gevur orku. At fáa eitt gott prát og geva íblastur til hvønn annan, er nakað heilt serligt. Eg eri málrættað, nærløgd, og dámi væl at vera kreativ. Eri jalig og framsøkin.

Við mínum vinnuliga íblástri, vóni eg at inspirera onnur at taka aktivan lut, at forma framtíðina hjá Klaksvíkar kommunu, so vit fáa ein livandi, spennandi og innbjóðandi kommunu at virka í.

Monica Ósá Henriksen
Valevni fyri Norðoya Tjóðveldisfelag