Síðsti heimadystur í ár er lagnudystur
Tað er trýst á føroyska liðnum fyri at vinna heimadystin í kvøld móti Lettlandi.
Skulu Føroyar ikki enda aftast í bólkinum, so skal kvøldsins dystur helst vinnast, tí eftir hendan dystin eru bara útidystir eftir í Norðurmakedónia og Armenia, og har verður torført at vinna.
Føroyar hava fingið tveir javnleikir á heimavølli í sínum heimadystum, har talan hevur verið um undirhaldandi dystir, sum kundu farið báðar vegir. Lettland er tað liðið, sum av teimum flestu verður mett sum tað veikasta av teimum trimum, sum Føroyar møta í bólkinum, og tí er tað her, at møguleikin fyri at vinna á pappírinum er størstur. Føroyar hava ikki vunnið ein kappingardyst síðani 2022, og tað hevur eisini lagt trýst á landsliðsvenjaran, sum hevur brúk fyri einum sigri fyri at betra um sínar møguleikar at halda fram í starvinum í 2025, har hann hevur sáttmála. Starvsnevndin í FSF hevur sambært Sosialinum og portal.fo havt fund um framtíðina hjá landsliðsvenjaranum, so hann situr ikki tryggur.
Sambært in.fo so verða tveir KÍ-leikarar frá byrjan í kvøld. Odmar Færø í miðverjuni og René S. Joensen á høgra vongi.
Dysturin á Tórsvølli byrjar kl. 19.45.