Sum Norðlýsið avdúkaði leygardagin, var pensjóneraði grannskoðarin Jógvan Amonsson áteknandi grannskoðarin hjá Bústøðum fyrstu 9 árini, seinast í 2021. Hesa uppgávu loysti hann sum ein av partnarunum í grannskoðarafyritøkuni Januar.

Greinin kann lesast her:

"Heftur grannskoðari brúktur sum óheftur serfrøðingur"

Samrøðan í Degi og Viku snúði seg um tvær grannskoðarafrágreiðingar um Bústaðir, eina frá Landsgrannskoðaranum og eina frá Januar. Amonsson bleiv biðin at meta um fakligu niðurstøðurnar í frágreiðingunum, har hann eisini skuldi taka dagar ímillum rættiliga ymisku niðurstøðurnar í frágreiðingunum báðum um fíggjarstøðuna hjá Bústøðum. Amonsson brúkti frágreiðingina hjá Januar til nærum at fríkenna Ingilín Strøm fyri at siga ósatt fyri Løgtinginum. Hinvegin segði hann, at Landsgrannskoðarin læs niðurstøður úr síni egnu frágreiðing, sum Amonsson ikki dugdi at finna.

Um Jógvan Amonsson hevði upplýst sítt søguliga tilknýti til Bústaðir og Januar fyri redaktiónini í Degi og Viku, var hetta blivi nevnt í sendingini fríggjakvøldið. Tað upplýsir Katrin Petersen, tíðindaleiðari í KVF fyri Norðlýsinum í skrivligum svari.

Tíðindaleiðarin leggur aftrat:

“Sjálvandi spurdu vit Jógvan Amonsson um hann hevði bindingar, sum forðaðu honum í at úttala seg um málið í tí leiklutinum, vit bóðu hann um. Tað metti hann seg eyðsæð ikki at hava.”

Norðlýsið fylgir málinum.