Ongin skal detta niðurímillum ella gloymast. Tað er ov nógv, sum ikki verður raðfest, tá vit tosa um okkara børn, ið bera brek. Ov nógv tilboð, sum ikki eru til. Og hettar skal broytast.

Vit liva í 2024, og enn hevur onki spælipláss í Klaksvík verið, sum er fyri tey við rørslutarni. Klaksvíkar kommuna hevur átt eina reiggju til tey rørslutarnaðu í meir enn tvey ár. Reiggjan kostaði yvir 200.000 kr, og nústani hevur kommunan funnið onkran at seta reiggjuna upp á spæliplássinum á Kráargøtu.

Hvussu ber tað til, at tað er so torført at fáa arbeiðsfólk til nakað, sum onga tíð tekur samanborið við so nógv annað í Klaksvík?

Klaksvíkar kommuna hevur onki tilboð til børn við menningartarni aftan á skúlatíð.
Tað er gott at fleiri fáa stuðulstímar í fríðtíðarskúlanum, men teir eru ikki fyri øll børn, og har mugu onnur tilboð koma.

Eisini er bíðilisti hjá børnum við autismu. Øll fáa ikki gagn av tí tilboði, sum kommunan bjóðar aftaná skúlatíð, og tað er ikki nóg gott.

Eitt annað øki, sum eisini kann gerast enn betur til børn við serligum tørvi, er Klaksvíkar svimjihøll.

Kommunan skal gera svimjihøllina meira atkomiliga til børn við rørslutarni. Hettar kann gerast við at fáa fleiri hjálpartól inn í skiftingarrúmini - bæði hjá kvinnum og monnum.

Vit skulu hava ein grynri hyl, sum er minst 35 hitastig. Hjálpartól, sum kunnu takast fram og setast í hylin, tá ein hevur eitt barn, sum ikki klárar at sita ella standa sjálvt.

Eina góða trappu í hylin, so avvarandi, sum eru noydd at bera børnini, koma lættari í hylin. Eitt mini spæliland í hylinum og nógvar baðileikur.

Slíkum hyli fáa eisini onnur smábørn og barnafamiljur gagn av.

Monica Ósá Henriksen