Mong munnu tey vera, sum nú klóra sær í nakkanum eftir stórsigurin hjá Donald Trump á Kamalu Harris. Donald Trump hevur havt mong rættarmál hangandi yvir høvur sítt, er ímóti fosturtøku, hevur havt misogynistisk úttalilsir, er ein eldri hvítur maður o.s.fr. Kortini valdu nógvar kvinnur hann, nógv ung, nógv litt fólk, nógvir latínamerikanarar. Hvussu bar tað til? Nøkur boð eru komin:

David Axelrod, ið var ráðgevi hjá Obama-kampanjuni, sigur, at tey sum arbeiða við høvdinum (akademikararnir, blðm.) hava víst vantandi virðing fyri teimum, sum arbeiða við hondunum og rygginum. Og Bernie Sanders, sum sjálvur kemur úr arbeiðarastættini, har familjan ikki hevði ráð til gardinur ella teppi, tekur blaðið frá munninum og sigur, at Demokratiski flokkurin hevur ”abandoned working class people”, svikið arbeiðarastættina.

Samanumtikið hava vælbjargaðu akademikararnir og tey reyð/grønu, sum hava yvirtikið siðbundnu vinstraflokkarnar, víst vantandi virðing fyri yrkjunum hjá upprunaliga limaskaranum í flokkunum, nevniliga arbeiðarunum, eitt nú við at vilja ofra størv hjá arbeiðarunum á t.d grøna altarinum. Eitt nú við at siga, at tað er í lagi, at verkafólk í oljuvinnuni missa størv síni vegna grønu kósina, sum tey eru komin við. Og Bernie Sanders leggur afturat, at valúrslitið týsdagin ber týðilig boð um, at arbeiðarastættin nú vendir Demokratunum bakið, tí flokkurin hevur vent arbeiðarastættini bakið.

Føroyski lesarin kann sjálvur meta um, hvørt hann sær líknandi rák í føroyskum politikki.