(Úr Norðlýsinum) Tað er blusan hjá mest vinnandi FM-leikaranum - saman við tveimum øðrum KÍ-arum - Steinbjørn Jacobsen, sum spældi í KÍ ’’V-blusuni’’ m.a. við 66-liðnum, sum hongur í niðaru hæddini í Bláa Skýlinum.

Tá áskoðarar síggja inní niðaru hæddina í Bláa Skýlinum, so síggja tey eina av eyðkendu KÍ-blusunum frá stórheitstíðini í 1950’unum, 1960’unum og fyrst í 1970’unum. Hon hevur eyðkenda hvíta V frammanfyri.

Hendan blusan er ikki bara ein tilvildarlig. Hetta er ein blusa, sum Steinbjørn Jacobsen hevur latið KÍ. Steinbjørn var ein av stóru stjørnunum á 66-liðnum hjá KÍ. Hann vann FM níggu ferðir og tað er tað mesta, sum nakar hevur vunnið í Føroyum saman við tveimum øðrum klaksvíkingum frá somu tíðini, Jógvan Jacobsen og Magnus Kjelnæs.

Samlaðu pengar til nýggja blusu

Valdagin 12. november hittu vit Steinbjørn Jacobsen til eitt stutt prát og myndatøku í niðaru hæddini í Bláa Skýlinum, har blusan hongur innrammað. Steinbjørn sigur, at hetta var blusan sum hann spældi í nærum øll FM-árini. Hann metir, at KÍ skifti til hesa blusuna í 1958 ella 1959, so fyrsta og kanska annað FM-heitið hjá Steinbirni var vunnið við einari aðrari. Steinbjørn heldur seg minnast, at leikararnir goldu 5 krónur í part sum part av at fíggja nýggju blusurnar um hetta mundi síðst í 1950’unum.

FM-metleikararnir í føroyskum fótbólti vunnu hesi árini (alt við KÍ):

Steinbjørn Jacobsen: 1957, 1958, 1961, 1966, 1967, 1968, 1969, 1970 og 1972

Jógvan Jacobsen: 1956, 1957, 1958, 1961, 1966, 1967, 1968, 1969 og 1970

Magnus Kjelnæs: 1957, 1958, 1961, 1966, 1967, 1968, 1969, 1970 og 1972