Hesa vikuna hoyra vit føroyskan tónleik burturav í KVF og livandi framførslur og framløgur kring landið. Vit vilja nevniliga hava allar Føroyar upp at darra í eina heila viku!

Ætlanin er, at Spæl Føroyskt skal gerast eitt landsumfevnadi tónleikaátak. Ein vika, har framførslur eru á hvørjum horni – allastaðni frá ellisheimum til tey stóru mentanarhúsini kring alt landið, og við øllum tónleikasløgum, alt frá føroyskum sálmum til modernaðan popp.

Og tað er okkara vón at tykkara miðil eisini vil varpa ljós á hesi tiltøk sum henda í Spæl Føroyskt vikuni, samstundis sum at tit sjálvi luttaka við at eitt nú spæla føroyskt og gera ymiskt tilfar við føroyskum tónlistafólkum ella persónum sum fyriskipa tiltøk í SF.

Tað vóru fleiri dagstovnar og skúlar, spælistøð og kirkjur og kommunur, sum hava tikið undir við vikuni seinastu árini, og vóna vit, at enn fleiri fara at vera við í ár. Tí heita vit nú á tykkum, um at vera við í hesum jaliga og mennandi átakið. Vit vilja, at vit øll í felag verja okkara tónleikaarv, menna tónleikapallin og kveikja áhuga fyri tónleiki og føroyskum tónleiki. Tónleikur hevur ein serligan eginleika at savna fólk og at skapa vælveru, um tað so er at lurta eftir tónleiki, spæla tónleik ella syngja við.

Soleiðis gerst man partur av Spæl Føroyskt

Skipa fyri einum (ella fleiri) tónleikatiltøkum í døgunum 22.februar - 2. mars og skráset tiltøkini á okkara heimasíðu (musikk.fo) - so gerst man partur av Spæl Føroyskt skránni.

Tað kunnu vera framførslur, framløgur, felagssangur ella annað, sum hevur við føroyskan tónleik at gera. Tað er bert hugflogið, sum setur mørk. Tónleikasamband Føroya varpar ljós á skránna og í tøttum samstarvi við KVF, varpa vit ljós á tykkara tiltøk.

Soleiðis standa vit saman um at varpa ljós á henda dýrgrip, vit øll eiga - tónleikin.

Vit gleða okkum at frætta frá tykkum.