Fyri at skilja tað, sum hendi í tinginum í dag, mugu vit skrúva tíðina aftur til seinasta heyst, tá tjóðveldistingfólkini Liljan Weihe og Erling Ejdesgaard vóru beinleiðis orsøkin til at Ingilín D. Strøm legði frá sær sum landsstýriskvinna.

Tey bæði vóru ikki bara atvoldin til at ein samgongufelagi – stjørnuskot Javnaðarfloksins - varð koyrd frá, men gjørdu tá beint ímóti boðunum hjá floksformanni og floksleiðslu, sum til tað síðsta royndu at sannføra og trýsta Liljuna og Erling.

Tað kann væl vera, at Høgni Hoydal ikki longur er formaður í Tjóðveldi, men hann hevur somikið stóra virðing í flokkinum, at slíkt kann ikki fara framvið uttan avleiðingar. Samstundis er greitt, at løgmansflokkurin ikki kundi liva við, at tey bæði ikki kendu sviðan fyri svikið.

Nú hava tey bæði so fingið sína revsing. Fyri fáum vikum síðani reyk Erling úr tinginum, tá flokkurin valdi at velja landsstýrisfólk uttanfyri tingbólkin í Fiskimálaráðið. Tað skal tó sigast, at valið av leirvíkinginum mest sannlíkt styrkir flokkin norðanfyri.

Og í dag misti Liljan tunga sessin í Uttanlandsnevndini, sum hon annars íðin hevur brúkt til at mótmæla fiskivinnusamstarvinum við Rusland. Liljan mist harumframt varasessin í Norðurlandaráðnum.