Tað endaði heili 4-0 í gamla klassikaranum í dag.

Í fyrra hálvleiki var KÍ omaná, men tó uttan at skapa nógvar málmøguleikar. Eitt mál kom tó, tá HB-leikari var óheppin at gera sjálvmál eftir, at Jonn Johannessen var farin væl ígjøgnum í vinstru síðu.

Í seinna hálvleiki bleiv stórur munur á liðunum. HB skifti fleiri álopskendar leikarar inn, og tað sá út til at geva KÍ betri pláss at spæla. Patrik Johannesen, Jákup B. Andreasen og Odmar Færø skoraðu allir eftir innlegg og so var 4-0. Tað kundi verið enn fleiri mál, tí stóran part av hálvleikinum var einvegis ferðsla, har KÍ var sannførandi.

KÍ hevur sostatt framvegis fult stigatal og rákið heldur, har KÍ spælir munandi betri móti teimum betru liðunum enn tá botn 5 liðini eru mótstøðulið. Nú stendur FM-stríðið fyribils millum KÍ og NSÍ.