– “Ongin hevði væntað, at laksaprísurin fór at falla so nógv, sum hann er fallin. Heldur óvæntað kemur nógvur laksur úr Noregi og Chile, og ongin sá tað koma. Sjálvt ikki MOWI, sum annars er alla staðni í heiminum, sá tað koma. Í februar væntaðu teir 2-3% vøkstur. Vit sjálvi á Bakkafrosti væntaðu 4-6%. Men nú vísir tað seg at kunna enda á 10%, og nú í fyrsta ársfjórðingi, áðrenn tað útjavnar seg, er vøksturin onkustaðni millum 15% og 20%, og tí virkar tað so ógvisligt í løtuni”, sigur Regin Jacobsen.

– “Hetta hevur gjørt tað, at laksaprísurin nærmast er kollapsaður. Hann er fallin óvanliga nógv. Men positiva síðan er, at fólk keypa nógvan laks av tí sama, tí hann er bíligur, og av tí sama hava vit fingið nógvar nýggjar kundar. Men nógv minni kemur inn í kassan, tá laksaprísurin er nógv lægri enn hann burdi verið, og tá er tað klárt, at vit mugu fyrihalda okkum til, men eg kann ikki siga nakað um júst hvussu, vit fara at reagera, enn”, sigur stjórin í Bakkafrosti.