Maja er 12 og eitt hálvt ára gomul, meðan systirin Ingrid skjótt verður 11 ár. Tær komu fram á fløskupostin úr Føroyum, sum eftir øllum at døma er skolaður inn í runuhylin av eini stórari aldu. Í fyrstuni vistu tær ikki, hvat tað var, og sóu bert eina grøna fløsku við onkrum hvítum í. Men so gekk tað upp fyri teimum, at talan var um ein fløskupost. Nógv vatn varð likið inn í fløskuna, so tær máttu nýta eina pincett at fáa samanfaldaða pappírið sundur; annars hevði tað skrædnað.

Tá tær endiliga fingu lisið tað, ið stóð har, sóu tær, at fløskuposturin var komin heilt úr Klaksvík – ein teinur upp á ikki minni enn 885 kilometrar. Fløskuposturin varð kastaður út á Føroya Sjómannadegi fyri knapt 12 árum síðani, tann 16. august í 2013.

Fara at seta seg í samband við sendararnar

Nú ætlar norska familjan at fáa samband við tann ella tey, sum sent hevur. Tað verður møguliga ikki heilt lætt, tí hondskrivaða navnið á pappírslepanum er vorðið nakað ólesiligt. Mamma genturnar, Toril Svarva, hevur á Instagram gjørt vart við seg yvirfyri bæði Norðlýsinum og Føroya Sjómannadegi, í vón um, at tað eydnast:

– ”Eg vóni, at sendarin ella sendararnir geva seg til kennar”, sigur hon, og leggur afturat, sum tað eitur á norskum, at ”det hadde været veldig artig”.