Eitt lágtrýst fer í landnyrðing og fer framvið beint sunnanfyri. Tað er tað – og eitt annað – sum hevur staðið fyri tí skiftandi veðrinum seinastu dagarnar.

Tá ið tað er komið eysturum. skulu vit bíða eftir einum hátrýst vestri í havi, sum kemur spakuliga ímóti okkum við lítlum vindi og ikki nógvum avfalli. Tað verður ikki fyrr enn tá liðið er út á seinnapartin sunnudagin, at vit fara at merkja tað.  

Men nóg mikið um tað – vit fara til veðrið um vikuskiftið:

Tað er eitt frískt lot til frískan vind av landnyrðingi í dag, 5 til 10 m/s, men í støðum sunnanfyri er hann upp í hvassan vind, 10 til 15 m/s. Samdrigið loft og regn. Í kvøld veksandi upp í frískan vind upp í strúk norðan, 8 til 13 m/s, framvegis samdrigið, men sum frá líður slítur í. Í nátt upp í frískan vind ella hvassan vind norðan, 10 til 15 m/s, skiftandi skýloft og ælaveður.

Hitin 4 til 10 stig.

Í morgin er eitt frískt lot til frískan vind norðan, 5 til 10 m/s, men í støðum upp í strúk, 13 m/s, skiftandi skýloft og ælaveður. Út á seinnapartin og um kvøldið veksur vindurin upp í strúk ella skrið, 13 til 18 m/s. Loftið er skýggjað við regni ella ælaveðri, og í støðum er kanska vátakavi. Um náttina frískur vindur upp í hvassan vind norðan, 10 til 15 m/s, skiftandi skýloft og ælaveður.

Hitin í morgin 4 til 10 stig.

Fyrrapartin sunnudagin og seinnapartin er frískur vindur upp í strúk norðan og av útnyrðingi, 8 til 13 m/s, skýggjað og okkurt ælið. út á kvøldið og um náttina niður í lot til frískt lot av útnyrðingi, 3 til 8 m/s, framvegis skýggjað og okkurt ælið, men út á mánanáttina fer at regna.

Hitin sunnudagin 4 til 10 stig.

Gott vikuskifti.