Landsfelag Pensjónista vil enn einaferð boða frá, at pensjónsaldurin hvørki skal hækkast upp í 69 ella 70 ár, soleiðis sum lógaruppskotið fyriliggur í løgtinginum í løtuni.

Ein kanning, ið Spyr.fo skipaði fyri í vár, vísti, at stórur meiriluti av teimum spurdu, ið vóru millum 18 og 67 ár, ikki tóku undir við hækkan av pensjónsaldrinum.

Pensjónsaldurin í Føroyum eigur at vera eins og Landsfelag Pensjónista hevur hildið og framvegis heldur, at pensjónsaldurin í vælferðarsamfelagnum í Føroyum skal vera 67½ ár.

Undir triðju viðgerð av løgtingsuppskotinum í mai í ár, tá pensjónsaldurin var til viðgerðar, har uppskotið var at hækka pensjónsaldurin upp í 70 ár, tók landsstýrismaðurin í almannamálum uppskotið aftur í síðstu løtu, áðrenn atkvøðast skuldi, tí onkrar broytingar skuldu gerast, eins og løgtingsmálið um Suðuroyartunnilin eisini bleiv tikin aftur.

Landsfelag Pensjónista er av tí áskoðan, at tað er beinleiðis skeivt, at enn einaferð verður pensjónsaldurin tvinnaður saman við Suðuroyartunnilinum fyri at bjarga landsins haldføri.

Ruth Vang, landsstýriskvinna í fíggjarmálum, hevur beinleiðis sagt, at Framsókn ikki tekur undir við einum Suðuroyatunnli fyrr enn pensjónaldurin er hækkaður, tvs. at hesi bæði løgtingsmál eru tvinnað saman, um man vil viðganga tað ella ikki.

Pensjónsaldurin í Føroyum er tann hægsti av øllum londunum rundan um okkum.

Spurningurin er, um Føroyar er so illa fyri fíggjarliga, at vit ikki hava ráð til at hava pensjónistar.

Argir 12. des. 2025

Beate L. Samuelsen, forkvinna 

Landsfelag Pensjónista