Tá Føroya Løgting í 2009 samtykti Brekrættindasáttmálin hjá ST, bundu Føroyar seg til at tryggja, at fólk, ið bera brek, hava møguleika at luttaka í samfelagnum á jøvnum føti við onnur.

Demokrati merkir fólkaræði – og fólkaræði er fyri øll.

Kortini síggja vit, at luttøkan ofta verður tarnað, tí umstøðurnar ikki eru lagaðar soleiðis, at øll fáa luttikið á jøvnum føti.

Tí fer Brekumboðið at gera vart við, at sambært Brekrættindasáttmálanum hjá ST, hava myndugleikar og samfelagið sum heild skyldu at tryggja atkomu og luttøku, soleiðis at fólk, ið bera brek, fáa tikið lut í politiskum og almennum lívi á jøvnum føti við onnur.  Hetta fevnir bæði um rættin at velja og at stilla upp.

Sáttmálin vísur eisini á, at fjølmiðlar skulu eggjast til at laga sínar tænastur soleiðis, at fólk, ið bera brek, fáa brúkt tær.

Brekumboðið fer tí at heita á fjølmiðlar, flokkar og onnur, ið skipa fyri tiltøkum í samband við valini, at hava hetta í huga.

Eitt nú við at hava teknmálstulk og at tekstað sendingar og tiltøk, ið verða sjónvarpaði og stroymd.

Á henda hátt ber til hjá deyvum, tunghoyrdum og øðrum at taka lut í politiska lívinum.

Brekumboðið minnir eisini á týdningin av góðum atkomuviðurskiftum.

Umráðandi er, at atkomuviðurskifti eru skipaði soleiðis, at eisini fólk við rørslutarni og onnur kunnu taka lut uttan forðingar