– ”Vit hildu, at nú var nokk. Eg og Uni Holm Johannesen tosaðu um tað tveir teir undanfarnu dagarnar, og vit vóru púra samdir um, at her var ikki meira at samstarva um. Vit vildu ikki koyra pensiónsmálið ígjøgnum, og tað bleiv so ein semja í flokkinum at gera tað upp á hendan mátan”, sigur hann, og leggur afturat, tá hann verður spurdur um, hví tey ikki fráboðaðu Framsókn tað fyrst, at:

– ”Eg haldi ikki, at vit í Javnaðarflokkinum skylda Framsókn nakað sum helst, so hetta var ein fínur máti at gera tað uppá”.

Avtalurnar, Jóhannis Joensen sipar til, vóru tær um, at samgongan skuldi bera bæði málið um at fyrireika, projektera og útbjóða Suðuroyartunnilin, sum løgmaður og formaðurin í Javnaðarflokkinum hevði lagt fyri tingið, og málið um at hækka pensjónsaldurin upp í 69 ár, sum var ein treyt frá Framsókn.

Til 2. viðgerð mánadagin hildu javnaðarfólkini orð og atkvøddu fyri báðum málunum, meðan 2 av 3 framsóknartingfólkum einans atkvøddu fyri at hækka pensjónsaldurin og ímóti uppskotinum frá løgmanni, ið eisini er formaður Javnaðarfloksins.