– ”Kenslan er ordiliga góð. Eg gleði meg til at fara í gongd við hesa uppgávuna. Bústaðir vóru eitt av teimum heilt stóru málunum í valstríðnum, og tað er eisini eitt av teimum mest umráðandi málunum, haldi eg, í øllum samgonguskeiðinum. Vit mugu fáa gjørt nakað á bústaðarøkinum, og eg eri sera fegin um, at tað gjørdist eitt av mínum málsøkjum”, sigur Margit Stórá. Spurd um raðfestingarnar sigur hon:

– ”Vit fara helst at byrja við uppskotinum um leigustuðul, og annars skulu vit hava fyri eyga, at vit vilja hava, at ung velja Føroyar, og til tað krevst, at loysnir fáast á bústaðarøkinum. Har er nógv at taka fatt í, men vit byrja sum sagt við leigustuðlinum. Leikluturin hjá almenna bústaðarfelagnum, Bústaðir, skal presiserast, so tey greitt vita, hvørjar bólkar tey skulu byggja til, og tað skulu vit fáa gjørt púra greitt rættiliga skjótt”, sigur hon, og leggur afturat:

– ”Eisini havi eg arbeiðsmarknaðarmál, sum tað stendur nógv gott í samgonguskjalinum, og javnstøðumál, og har fari eg veruliga í arbeiðshandskarnar”.

Margit Stórá er saman við Bárði á Lakjuni fuglfirðingur, og veit hon ikki um fordømi um, at tað er hent fyrr, at tvey úr Fuglafirði hava verið landsstýrisfólk samstundis áður.  

Margit Stórá og Bárður á Lakjuni eru bæði úr Fuglafirði