Áhugabólkur Pensjónista heldur, at pensjónirnar hækka ov lítið samanborið við lønirnar. Bólkurin krevur ein nýggjan javningarleist og ein serligan kekk til tey, sum einans hava pensjón at liva av.
Pensjónshækkanin fyri 2026 eigur í minsta lagi at vera 1.345 krónur um mánaðin. Tað heldur Áhugabólkur Pensjónista, sum í einum skrivi samanber lønarhækkingar og pensjónshækkingar fyri skatt.
| Ár 2025 (kr.) | Ár 2026 (kr.) | MUNUR (kr.) | |
| Mánaðarløn Havnar Arbeiðarafelag | 28.151 | 28.957 | 806 |
| Skrivstovufólk Starvsfelagið Bólkur 3, stig 1 | 28.356 (1/10-24) | 30.241 (1/10-25) | 1.884 |
| Fólkapensjón +samhaldsfasti støk (gomul) | 15.981 | 16.435 | 454 |
| Fólkapensjón + samhaldsfasti gift (gomul) | 13.856 | 14.252 | 396 |
| Fólkapensjón + samhaldsfasti støk (nýggj) | 16.398 | 16.863 | 465 |
| Fólkapensjón + samhaldsfasti gift (nýggj) | 14.067 | 14.469 | 402 |
| Hægsta fyritíðarpensjón støk | 16.290 | 16.732 | 442 |
| Hægsta fyritíðarpensjón gift | 13.803 | 14.177 | 374 |
| Miðal fyritíðarpensjón støk | 13.411 | 13.800 | 389 |
| Miðal fyritíðarpensjón gift | 11.181 | 11.482 | 301 |
| Lægsta fyritíðarpensjón støk | 12.683 | 13.723 | 1.040 |
| Lægsta fyritíðarpensjón gift | 11.059 | 11.331 | 272 |
Sambært yvirlitinum hjá bólkinum hækkar mánaðarlønin hjá arbeiðarum í Havnar Arbeiðarafelag úr 28.151 upp í 28.957 krónur. Tað eru 806 krónur meira um mánaðin.
Til samanberingar hækka fólkapensjón og Samhaldsfasti tilsamans millum 396 og 465 krónur um mánaðin, alt eftir hjúnastøðu og pensjónsskipan.
Hjá fyritíðarpensjónistum eru hækkingarnar millum 272 og 442 krónur, tó við einum undantaki: Lægsta fyritíðarpensjón hjá støkum hækkar sambært yvirlitinum 1.040 krónur um mánaðin.
Áhugabólkurin heldur, at javningarleisturin frá 2021, sum landsstýrið nýtir, hvørki er rímiligur ella nøktandi.
Uppskotið um 1.345 krónur er roknað sum miðaltalið av teimum báðum lønarhækkingunum, sum bólkurin vísir til: 806 krónur hjá arbeiðarum og 1.884 krónur hjá skrivstovufólki á byrjunarstigi hjá Starvsfelagnum.
Harumframt vil Áhugabólkur Pensjónista, at tey, sum einans hava pensjón at liva av, fáa ein serligan eldra- ella pensjónskekk.
