Harafturat skal havast í huga, at um slit var nú, og løgmaður ella løgtingið útskivaðu val, so eru tíðarfreistirnar ásettar soleiðis, at løgmaður skal áseta valdagin við í minsta lagi 4 viku freist og í mesta lagi 5 viku freist. Hesar freistir hava ta avleiðing, at um val verður útskrivað nú, verður valið ikki fyrr enn í januar.

Málið um fiskivinnunýskipanina hevur verið stóra framhaldssøgan í ár. Viðgerðin hevur vigað nógv í kjakinum og í politisku skipanini í skjótt eitt ár. So nógv, at fleiri onnur trupul mál liggja og bíða.

Ofta verður sagt at ein samgonga skal fremja tey sonevndu truplu málini tíðliga í einum valskeiði. Verandi valskeið er nú meira enn hálvrunnið, men enn manglar samgongan at fremja lovaðu nýskipaninar. Fiskivinnunýskipanin er komin til 2. viðgerð, men ivamál er um semja er í samgonguni. Verandi fiskivinnuskipan gongur út 01.01.18, og trýstið er nú á øllum pørtum av samgonguni.

Um semja ikki finst fyri fiskivinnunýskipanini fyri jól, so er stóri spurningurin um samgongan ikki má geva skarvin yvir. Tí er fiskivinnunýskipanin at meta sum ein kabinettspurningur. Ein kabinetspurningur er eitt politiskt mál har ein stjórn frammanundan hevur boðað frá, at um ikki málið verður samtykt, so leggur hon frá sær og/ella skrivar út nýval.

Samgongan hevur nú sitið í góð tvey ár, og ein grundleggjandi nýskipan av fiskivinnuni er nevnd sum eitt av høvuðsmálunum í samgonguskjalinum. Hvørki løgmaður ella landsstýrismaðurin í fiskivinnumálum hava rópt málið fyri ein kabinettspurning, men spurningurin er um tað ikki er júst við hesum uppskotinum at vit fáa at síggja um samgongan megnar at halda, ella um hon slitnar. Verður fiskivinnunýskipanin samtykt, so verður samgongan helst sitandi valskeiðið út. Fellur uppskotið við 2.viðgerð fríggjadagin, ella við 3.viðgerð, so er ikki óhugsandi at samgongan leggur frá sær.