Torravikan bæði byrjar og endar við tí mentanarliga. Ítøkiliga byrjar hon við framsýningum av ávikavist listarverkum og klædnasniðgeving úr sjófeingi. Ein røð av fyrilestrum eru á skránni, ið spenna frá Flemish Cap til Læknastríðið og víðari. Heilsuliga vinklinum tekur Klaksvíkar Sjúkrahús sær sum vant av bæði so og so við síni afturvendandi Heilsucafé og Torrarenning. Tónleikurin fevnir frá konsert yvir harmoniku og til Spaniastovu, og filmssýningar við filmi hjá Zacharias Hammer verða í Atlantis.

Fiskurin er sjálvt upphavið til torra, ið var útróðrarmánaður burturav. Í tráð við hetta fara nakrar av matstovunum í býnum at gera nakað eyka burturúr fiskarættum hesa vikuna.

Sum skilst við at kaga í skránna, ið liggur ovast á heimasíðuni, er hetta bert ein evarska lítil partur av tí, sum verður á skrá torradagarnar 2018. Veðrið hesa vikuna verður skiftandi, men nærum øll tiltøkini vera kortini innandura, so nakrir regndropar áttu ikki at bilað. Sum maðurin segði: “Um nakar keðir seg hesa vikuna, hevur hann sjálvur skyldina av tí.”

Sí torraskránna her.