Uppskeringin av hvali á Sjómannadegnum útbygd í ár
Teir tríggir, Tummas Lervig, Jóannes Mørkøre og Asbjørn Østerø royndu seg við at bjóða fram grillað tvøst á Sjómannadegnum í fjør.
Tiltakið var sera væl eydnað og flestu sum royndu tað vóru í veruleikanum ovfarin av, at grindahvalatvøst kundi grillast bara stutt bil og haraftur at smakka so framúr væl. Flestu vit onnur eru von við, at tvøstið skal kókast leingi ella turkast í mánaðir, áðrenn tað kann etast.
Teir tríggir vístu okkum nakað annað á Sjómannadegnum í fjør.
Nú ætla teir sær meira hesaferð. Tá Grindamannafelagið fer at sýna fram uppskering av hvalinum, sum vit fingu úr Gøtu í fjør, fer eisini at vera møguligt at royna grillað tvøst á framsýningini. Pallurin verður útbygdur við grillum og servering, samstundis sum Grindamannafelagið fer at skera upp hval undir góðari vegleiðing frá Hans Jákup Hermansen, ið eisini greiður frá á enskum.
Sjómannadagurin og teir tríggir "eldsálirnar" takka fyri, at til bar at fáa tvøst til tiltakið!
Niðanfyri nakrar myndir frá tá menninir fingu tvøstið til høldar úr Gøtugrindini í gjár, sum Tummas Lervig hevur tikið við telefon síni: