48 ára gamli Espen Haug hevur verið høvuðsvenjari á hvørjum ári síðani 2008 við undantaki av 2017. Hann hevur vant lið í trið- og fjórðbestu norsku deildini umframt eitt ár í næstbestu norsku deildini. Hann hevur sostatt nógv fleiri royndir sum høvuðsvenjari enn Haakon Lunov, sum hevði trý kappingarár sum høvuðsvenjari, sum vóru í trið- og fjórðbestu norsku deildini. Sum leikari er hann skrásettur fyri 61 dystir í næstbestu norsku deildini og 9 dystir í bestu norsku deildini.

Talan hevur verið um sera støðugan venjara. Tí øll hesi árini hevur hann bara vant tvey feløg. Raufoss frá 2008-2016 og Gjøvik-Lyn frá 2018-2023. Tað er tó greitt, at Espen Haug ikki verður høvuðsvenjari hjá KÍ, tí hann hevur ikki A-venjaraútbúgvingina, sum er eitt krav.

Hyggja vit eftir leikskipanum, so finnast bara upplýsingar á Transfermarkt frá 2021-2023. Útfrá tí, so hevur hann spælt ymiskar leikskipanir, men næstan altíð við fýra í bakketuni. Mest brúktu leikskipanirnar hava verið 4-4-1-1, 4-2-3-1, 4-3-3 og 4-5-1.