Donald Trump, sum eftir øllum at døma verður forsetavalevni hjá Republikanska flokkinum í USA, hevur í valstríði sínum ofta brúkt tónleik hjá kenda bólkinum Rolling Stones. Áðrenn veljarafundirnir eru byrjaðir, eru sangir hjá Rolling Stones brúktir til at kynda undir stemningin á fundinum, men í hesi vikuni boðaði tónleikabólkurin frá, at hann - eins og nógvir aðrir bólkar, vil ikki vera settur í samband við Donald Trump.

Men Donalt Trump lurtar ikki eftir áheitanini.

”Vit brúka so nógvar sangir og vit hava rætt til at brúka teir. Eg keypi altíð rættindini,” sigur Trump við sjónvarpsstøðina CNBC.

Og at hann ikki lurtar eftir áheitanini frá Rolling Stones kom til sjóndar í gjár. Tá vórðu løgini ”Start Me Up” og ”You Can’t Always Get What You Want” spæld, tá Trump endaði ein veljarafund í Charleston í West Virginia.