Colin Powell: Trump er ein skemdarblettur fyri tjóðina
Teldubrøv hjá fyrrverandi republikanska uttanríkisráðharranum og generalinum, Colen Powell, eru likin út til almenningin
Teldubrøv hjá fyrrverandi republikanska uttanríkisráðharranum og generalinum, Colen Powell, eru likin út til almenningin, og í onkrum av teldubrøvunum sigur Powell sína hjartans hugsan um bæði Donald Trump og Hillary Clinton.
Millum annað skrivar Colin Powell, at Donald Trump er “ein skemdarblettur fyri tjóðina” og “eitt altjóða útskot”. Tað upplýsir tíðindastovan AP, sambært fleiri amerikanskum miðlum.
Teldubrøvini vórðu almannakunngjørd á heimasíðuni DCLeaks.com, týsdagin, og Colin Powell hevur síðani váttað innihaldið.
“At kalla hann idiot eggjar hann bara,” skrivar Powell millum annað í einum teldubrævi, sum er sent starvsfólkum í Republikanska flokkinum, og hann sigur eisini, at Trump hevur hvørki eina republikanska ella konservativa filosofi.
Teldubrøvini eru sambært AP send í tíðarskeiðinum frá mars 2015 til august í ár.